الكميرا الفورية instax 25

كميرا instax 25  الفورية .. من فوجي فيلم 

أحدث من instax8 و  instax9  .. تتميز عنهم بعدة اشياء اولها ميزة السيلفي .. عيبها ان بطاريتها مو متوفره مثل بطارية 8 و 9 ..

سعرها 367 تقريباً , تختلف من مكان للثاني .. 

لونها من الوسط ابيض و من الاطراف تجي الوان ثانيه : ازرق , لؤلؤي و اخضر و غيره .. اما 8 و 9 فيجي لون الكميرا كله واحد و الوانها مات و جذابه اكثر ..

يجي معاها بطاريتها وهي بطارية غير قابله للشحن ( يعني كل م خلصت تغيرينها ) + خيط حامل يتعلق اسفل غطا البطاريات + عدسة حماية للعدسة ..

راح تحتاجين معاها فيلم ينباع لوحده ما يجي معها سعره 39 او اقل , فيه 10 صور .. 

اول شي ترفعين الغطا الصغير اللي فالجزء الايمن و تركبين البطاريه , ع الغطا راح يكون فيه ايكون ع شكل بطارية ..

بعدها ع اليسار راح يكون فيه زر صغير رمادي مكتوب عليه FILM  تسحبينه لاسفل و يفتح لك غطا مكان الفيلم و تركبين الفيلم .. كيف ؟ ع طرف الفيلم راح تكون فيه علامة صفرا تحطينها فوق العلامة الصفرا اللي راح تلاقينها تحت غطا الكميرا .. 

بعد كذا نضغط زر الباور الاحمر اللي راح يكون اعلى الكميرا ..

راح يكون اعلى الكميرا من اليمين لليسار :

العدسة - زر الباور - شاشه - زر تحددين منه اذا كنتي تبغين تحطين فلاش او منظر طبيعي او ولا حاجة - و زر مكتوب فوقه D/L 

D = DARK = ظلام 

L = LIGHT = ضوء 

تحددين الاعدادات حسب المكان و الاضاءة اللي انتي فيها .. افضل شي م تلعبين فيها و تتركين الكميرا تحدد تلقائي ..
تشوفين من العدسة الصغيره اللي في اعلى اليمين وقت ما تحسين اللقطة مناسبة تضغطين الزر اللي في وجه الكميرا عشان تلتقطين ..

الصورة مراح تنعاد عشان كذا تأني فيها و حاولي تصورين ع اضاءة الشمس لانها دايماً الافضل .. 

ممكن تصورين بالطول او بالعرض عني افضل الصور اللي بالطول .. و زي ما قلت فيها خاصية السيلفي كل اللي عليك انك تقلبين وجه الكميرا جهتك و تصورين ..

اول صورة بالفيلم راح تطلع لك ورقة سودا هذا غلاف الفيلم .. فأول صورة ما تنحسب ..

راح تطلع لك الاعدادات و عدد الصور الباقيه في الفيلم على الشاشه الصغيره ..

بعد م تطلع الصوره خليها دقيقتين ثلاث وراح تتوضح اهم شي (( لا تهزين الصورة )) . 

لا تسحبين الصورة خليها تطلع براحتها , لا تقلبينها ع وجهها يعني خلي وجهها ع فوق , لا تعرضينها لحراره , لا تعرضينها للشمس مباشرة , لا تلمسين العدسة عشان م تجي طبعات اصابعك عليها , واكيد ابعديها عن الاطفال ..

يجي معاها دليل استخدام بس مو بالعربي لكن راح تفهمين من الصور .. يحكي لك ان استخدامها له 3 خطوات :

1- البطاريات 

2- الفيلم 

3- التصوير ( الالتقاط - اخراج الصورة - انتظارها حتى تتضح ) 

راح تحتاجين معها غلاف او شنطة لها , البوم للصور .. 

تبقى الصور الفورية هي الاجمل و الاحب خاصه في تصوير الاشخاص ..

الصورة تطلع صغيرة مقارنة بصور الكميرا الفورية زمان .. وفيها اطار ابيض و من تحت الاطار يكون عريض شوية مناسب انك تكتبين عليه تاريخ الصورة او اي ملاحظات ..